Во рамки на 16. коло од Трета лига – Југозапад, љубителите на фудбалот ќе имаат можност да проследат вистинско дерби, откако второпласираната Могила ќе гостува кај лидерот Влазними во Струга.
Станува збор за директна пресметка за врвот на табелата, во која Влазними влегува како првопласиран со 31 бод, додека Могила е веднаш зад него со 28 бодови. Влогот е огромен, а натпреварот најавува голема неизвесност во битката за првото место.
Во пресрет на дербито, капитенот на Могила, Антонио Спировски, испрати силна порака и дополнително ја подгреа атмосферата.
„Играме натпревар во Струга за историја, за моментот за кој сонувавме ние, но и генерации пред нас. Пред три години почнавме од почеток, од Б лигата каде бевме шампиони, следната сезона во А лигата повторно шампиони, а еве денес сме на само чекор до нова шампионска титула и историски пласман во Втора македонска лига. На почетокот дадов едно ветување, поврзано со моите фудбалски квалитети, кога многумина зборуваа дека заслужувам да играм професионален фудбал. Тогаш кажав: многумина сакаат да ме видат во некој второлигашки клуб, но јас ветувам дека Втора лига ќе ја донесам во Могила! Тогаш можеби звучеше нереално, но знаев што сонувам и што сакам. Денес сме на чекор од целта. Гостуваме кај лидерот, клуб со богата историја и квалитетни фудбалери кои биле дел и од Првата лига. Ги респектираме, но знаеме дека не очекува вистинска фудбалска претстава и верувам дека на крајот ние ќе се радуваме. Ќе играме за нас, за цела Могила и за сите кои заедно со нас го сонуваат овој сон“, вели Спировски.
Дербито во Струга носи голем притисок, но и огромна мотивација за двата тима, кои ќе се борат за клучни три бода во трката за шампионската позиција. Се очекува вистинска фудбалска битка, достојна за значењето што го носи овој натпревар.
