Капитенот на машката сениорска репрезентација, Никола Ѓоргиев, со својот Карловарско обезбеди пласман во финалето на плејофот во чешката Екстралига, откако полуфиналната серија ја завршија убедливо со 3-0 во победи против Дукла Либерец.
Тимот од Карлови Вари, кој регуларниот дел од сезоната го заврши на првото место, доминираше во сите три натпревари, славејќи со 3:1, 3:0 и 3:0. Ѓоргиев блесна на првиот меч со 17 поени и беше најефикасен на теренот, додека во вториот натпревар одигра еден сет и запиша еден ас. Во третиот дуел беше во составот, но не доби минутажа.
Во финалето, Карловарско ќе го чека подобриот од дуелот меѓу Чешке Будејовице и Прага, каде резултатот во моментов е израмнет на 1-1 во победи.
Во меѓувреме, искусниот македонски интернационалец Ристо Николов стави крај на својата богата играчка кариера. Како капитен на Нефелс, тој ја заврши сезоната како вицешампион на Швајцарија, откако неговиот тим загуби во финалната серија од Амрисвил со 3-0 во победи.
Во последниот натпревар, Нефелс беше поразен со 3:2 (25:20, 18:25, 17:25, 33:31, 12:15), а Николов одигра цел меч и забележа девет поени – пет од напад и четири од блок. Со тоа, средниот блокер достојно ја заокружи својата успешна кариера.
