Деветтото коло на Втората женска фудбалска лига донесе триумф за Билјанини Извори со 3:5 над Слободен на „Борис Трајковски“ во Маџари.
Гостинот од Охрид уште во првиот дел најави дека бодовите одат покрај Охридското Езеро, откако преку Елеонора Митреска го отвори резултатот во 2. минута, а седум минути подоцна Стефанија Ристова погоди за 0:2.
Билјанини Извори дојде и до предност од три погодоци откако во 35. минута стрелаше Марија Јулчовска за 0:3 во Маџари. На две минути пред крајот на првиот дел Ева Андонова постигна гол против својот поранешен клуб за 1:3 на полувреме.
Во вториот дел Ева Андонова со втор гол во 56. минута намали на 2:3 и се обиде Слободен да се врати во игра, но охридскиот тим не дозволи изненадување па во финишот на мечот ги реши сите дилеми за победникот.
Во 83. минута Ивана Николоска погоди за 2:4, а во 88. минута Ристова постигна втор гол за 2:5. Две минути подоцна Андонова со свој трет гол комплетирање хет-трик за конечни 3:5.
Во Радовиш немаше победник откако Плачковица и Борец ремизираа играјќи 1:1. Гостинот од Велес преку Мине Амедова во 44. минута го отвори резултатот за водство од 0:1 на полувреме. Во вториот дел неизвесноста беше до самиот финиш, гостинот се обидуваше да креира изгледна шанса за втор гол, но во 87. минута Розета Ташкова погоди за конечни 1:1.
Лидерот Конзули се прошета до Македонски Брод каде со 0:6 го доби Порече. Непоразениот лидер беше како на тренинг, а на овој меч хет-трик постигна Марија Стојановска, по еден гол постигнаа Стефанија Перканоска, Сара Петровска и Ангела Димовска.
На врвот е Конзули со максимални 27 бодови, Билјанини Извори е втор со 19 бодови, со што поранешниот шампион од Охрид кој играше квалификации за Лига на шампиони се подготвува за бараж за влез во Прва лига.
Трет е тимот на Порече со 16 бодови, Слободен е четврти и има девет бодови, Плачковица е петта со четири бодови, а толку има и Борец.
