Радовиш викендов ќе живее во знакот на фудбалот, откако ФК Детонит – Плачковица (пионерски категории) ќе го организира „Велигденски турнир 2026“, кој ќе се одржи на 11 април (сабота) на Градскиот стадион со почеток од 09:00 часот.
Турнирот кој по првпат се организира веќе предизвика огромен интерес, а организацијата потврди дека пријавите се затворени, со оглед на тоа што сите места се пополнети. На терените во Радовиш ќе настапат околу 450 млади фудбалери, кои ќе ги бранат боите на клубови од Македонија, Србија и Бугарија.
Станува збор за натпреварување во повеќе возрасни категории, односно генерации 2013, 2014, 2015, 2016, 2017 и 2018, што гарантира динамична и содржајна програма во текот на целиот ден. Организаторите предвидоа и различен формат на игра во зависност од возраста, со цел да се овозможи максимален развој и уживање на младите фудбалери.
„Велигденски турнир 2026“ не е само спортски настан, туку и можност за дружење, стекнување нови пријателства и промоција на фер-плеј вредностите меѓу најмладите.
Медиумски покровител на турнирот е Спортска Мрежа, која ќе обезбеди целосно следење на настанот, со информации, фотографии и содржини од теренот.
Со ваква бројност и интернационален карактер, Радовиш уште еднаш ќе потврди дека е важна дестинација на мапата на младинскиот фудбал во регионот.
