Дербито на 13. коло во Првата женска фудбалска лига го доби Каменица Саса откако тимот славеше над актуелниот шампион Љуботен со 2:1.
Дербито на колото беше важно и за двете екипи, трите бодови беа императив во борбата и трката за шампионската титула и излезот во Европа. Во Македонска Каменица беа постигнати три погодоци, за триумф на „рударите“ над шампионот Љуботен со резултат од 2:1.
По само 15 минути игра 21-годишната Бразилка, Туане Де Соуза Фрагосо постигна гол за водство од 1:0, резултат со кој се замина и на полувреме.
Во вториот дел бугарската интернационална Антонина Шопска постигна гол во 62. минута за двојна предност на Саса во дербито на колото. Љуботен започна со уште поголем притисок и дојде до 2:1 преку голот на 33-годишната Колумбијка Ингрид Јулиет Видал Исаза со што Љуботен во финишот на мечот се обиде да дојде и до израмнување, но Саса беше одлична и не дозволи изненадување, а со тоа трите бодови останаа во Македонска Каменица.
Ваквиот кикс на Љуботен најмногу му одговараше на непоразениот лидер Тиверија Брера, откако денес струмичкиот тим со 1:3 славеше над Топ Гол и победнички се прошета низ Битола.
Домаќинот преку Анастасиа Илиевска прв дојде до водство уште во 18. минута, а до крајот на првиот дел Билјана Панеска и Теона Галабовска постигнаа два брзи погодоци за 1:2 на полувреме и резултатски пресврт.
Во вториот дел Топ Гол се обидуваше и правеше напори, а сите дилеми ги реши Бразилката Тчеури Харуми Гоја.
Речица на домашен терен одново беше поразена откако загуби од Истатов со 2:4. За домашниот тим Емили Митковска беше двоен стрелец, а за гостинскиот тим Радица Чонева постигна два гола, а по еден гол постигнаа Канита Емини и Ана Нешковска.
Скопје на домашен терен славеше висока победа од 3:0 над битолски Атлетико, во меч каде Мила Панева во 51. минута постигна гол за 1:0, откако во првиот дел мрежите мируваа, а во финишот на мечот два брзи гола за конечни 3:0 постигна Елена Наумоска.
Во однос на табелата Тиверија Брера со 34 бодови е лидер на табелата, без ниту еден пораз, Каменица Саса е втора со 30 бодови, а пак Љуботен е трет со 28 бодови, но и меч помалку.
- ЦЕЛА ТАБЕЛА ОД ПРВАТА ЖЕНСКА ФУДБАЛСКА ЛИГА:
| Поз. | Клуб | ОН | Поб | Н | Пор | ПОС | ПРИ | ГР | БОД |
|---|---|---|---|---|---|---|---|---|---|
| 1 | ЖФК ТИВЕРИЈА БРЕРА АД | 12 | 11 | 1 | 0 | 65 | 5 | +60 | 34 |
| 2 | ЖФК КАМЕНИЦА САСА | 12 | 10 | 0 | 2 | 40 | 9 | +31 | 30 |
| 3 | ЖФК ЉУБОТЕН | 11 | 9 | 1 | 1 | 37 | 7 | +30 | 28 |
| 4 | ЖФК СКОПЈЕ 2014 | 12 | 8 | 0 | 4 | 27 | 14 | +13 | 24 |
| 5 | ЖФК СЦ ИСТАТОВ 2015 Скопје | 11 | 4 | 1 | 6 | 15 | 31 | -16 | 13 |
| 6 | ФК ТОП ГОЛ/ЖФК | 11 | 2 | 2 | 7 | 11 | 24 | -13 | 8 |
| 7 | ФК АТЛЕТИКО/ЖФК | 12 | 2 | 1 | 9 | 11 | 31 | -20 | 7 |
| 8 | ФК АСС УНИТЕД/ЖФК | 11 | 2 | 0 | 9 | 18 | 32 | -14 | 6 |
| 9 | ЖФК РЕЧИЦА | 12 | 1 | 0 | 11 | 6 | 77 | -71 | 3 |
| 10 | ЖФК ШКЕНДИЈА Тетово(-3) | 0 | 0 | 0 | 0 | 0 | 0 | 0 | -3 |
