Четвртфиналето од футсал Купот на Македонија ќе се игра во два дена. Познати термините за натпревари на кои ќе се води борба за полуфинален билет.
Ланскиот финалист Осогово во Крива Паланка ќе го пречека непоразениот тим во македонскиот футсал Проект, натпревар кој ќе се одигра во среда со почеток од 19:30 часот.
Исто така, в среда ќе се одигра и натпреварот меѓу Балкан и Јувентус Серава, а овој неизвесен дуел ќе стартува во 21 часот.
Во Кавадарци ново соочување на Клими и актуелниот бранител на Куп титулата Форца. Овие две екипи одиграа меѓусебен дуел пред неколку дена во шампионатот, кога Клими излезе како победник, а сигурно е дека сега Форца ќе сака „одмазда“ и тоа одново на истиот терен во салата „Јасмин“ со почеток од 20:30 часот.
Со натпреварот меѓу Бутел и Кеби Моби кој ќе се одигра в четврток ќе се добие последниот полуфинален патник.
Форца ја брани Куп титулата, а пак Проект најави отворени амбиции да ја освои истата, заедно со шампионската титула и да ги обедини двете титули, откако тоа го направи Форца двапати во низа.
