Нема промени на врвот на табелата и по четири одиграни кола во втората фаза од Првата македонска кошаркарска лига. Четирите водечки екипи – Бутел, Соколи 1933, Струмица 2001 и Борец баскет – запишаа нови победи и остануваат израмнети на врвот на табелата во ТОП 8 фазата.
Најефикасен натпревар одигра екипата на Бутел, која на домашен терен славеше убедлива победа над Водно Санс со 132:93. Домашниот тим уште во првото полувреме постигна дури 69 поени, наспроти 42 на противникот, со што го трасираше патот кон нов триумф. Најефикасни кај Бутел беа Атанасов и Кнежевиќ со по 30 поени, Мартиновски додаде 13, а Хот 12. Кај Водно Санс се истакна Димитриев со 21 поен, додека Бајалџиев реализираше 16, Митев 15, а Сребров 14 поени.
Возбудлив натпревар се одигра во Велес каде Борец баскет со 79:76 го совлада тимот на Мега баскет. По изедначеното прво полувреме, велешани одиграа одлична трета четвртина (25-12) со која направија пресврт и предност од 61:55. Таа разлика успеаја да ја задржат до крајот на натпреварот. Џејмс беше најдобар стрелец со 28 поени, Трпески постигна 17, а Чадамов 16. Кај гостите Враниќ реализираше 23 поени, Јованоски 13, а Димитриевски 11.
Убедлив триумф оствари и Струмица 2001, која на домашен терен го совлада Охрид со 75:49. Домашниот тим одигра одлично во одбраната, особено во вториот период кога на противникот му дозволи само четири поени. Струмичани веќе на полувремето имаа убедлива предност од 34:16. Најефикасен беше Д. Пандев со 22 поени, Александровски додаде 18, а Коцев 13. Кај гостите Димитриевски реализираше 12 поени.
Штипски Соколи 1933 исто така продолжува со победничката серија, откако убедливо го совлада младиот тим на Вардар со 117:71. Прашањето на победникот беше решено уште во првото полувреме кога домаќините поведоа со 59:34. Караколев беше најефикасен со 18 поени, Нацевски постигна 15, Костадинов 14, Хамилтон 12, а Тодоровски 10. Кај Вардар најдобар стрелец беше Митревски со 15 поени, пред Ѓорѓевиќ со 14 и Аврамовски со 10.
По четири кола во ТОП 8 фазата, Бутел, Соколи 1933, Струмица 2001 и Борец баскет се израмнети на врвот со по 17 бодови.
Резултати – ТОП 8 (4. коло):
Борец баскет – Мега баскет 79:76
Струмица 2001 – Охрид 75:49
Соколи 1933 – Вардар 117:71
Бутел – Водно Санс 132:93
- Табела – ТОП 8:
Бутел – 17
Соколи 1933 – 17
Струмица 2001 – 17
Борец баскет – 17
Мега баскет – 14
Вардар – 14
Водно Санс – 12
Охрид – 12
Следно коло (14 март):
Струмица 2001 – Вардар
Бутел – Мега баскет
Соколи 1933 – Охрид
Борец баскет – Водно Санс
Во Плеј-аут лигата, лидерот Тетекс ТТК продолжува со одличните настапи. Тетовци славеа на гостувањето кај Струмица Ролинг со 82:65. Клучна беше третата четвртина во која гостите направија предност од десет поени и ја задржаа до крајот. Теофиловски беше најефикасен со 27 поени, Шуменковски постигна 16, а Макревски 11. Кај домаќините Атанасов реализираше 20 поени, Мицев 16, а Абрашев 15.
Важна победа во битката за опстанок оствари Спортисимо, кој на домашен терен го совлада Младинец со 90:76. Митрев беше најдобар со 32 поени, Ристовски додаде 26, а Митков 17. Кај гостите Шуменковски постигна 15 поени, Гелов 12, а Мантев 11.
Во последниот натпревар од колото Црн Дрим славеше на гостувањето кај Овче Поле со 91:79. Д. Шабани постигна 29 поени, а А. Шабани додаде 12. Кај домаќините Трифуновски реализираше 15, а Каришик 10 поени.
Резултати – Плеј-аут (4. коло):
Струмица Ролинг – Тетекс ТТК 65:82
Спортисимо – Младинец 90:76
Овче Поле – Црн Дрим 79:91
- Табела – Плеј-аут:
Тетекс ТТК – 15
Овче Поле – 13
Црн Дрим – 13
Струмица Ролинг – 11
Младинец – 10
Спортисимо – 10
Следно коло (14 март):
Црн Дрим – Струмица Ролинг
Тетекс ТТК – Спортисимо
Младинец – Овче Поле.
