Екипата на Алкалоид, домаќин на групната фаза во Купот на Македонија, со две убедливи победи обезбеди место на завршниот Ф4-турнир. Во групата беа и Пролет, Радовиш и Македонија Ѓорче Петров, а „сино-белите“ покажаа моќна игра и доминација уште од стартот.
На стартот, Алкалоид го совлада Радовиш со 41-21. Тренерот Кирил Лазаров им даде шанса на сите ракометари, а најдобар беше Стојковиќ со осум гола. По пет погодоци реализираа Дамјан Митев и Никола Костески, додека голманот Николовски забележа 11 одбрани. Кај Радовиш се истакна Томче Трајчевски со осум гола.
Во другото полуфинале, Пролет рутински го совлада тимот на Македонија Ѓорче Петров со 37-29. Најефикасни беа Симоновски со седум и Дамчевски со пет гола, додека голманот Трајков собра 10 одбрани. Кај Македонија Ѓорче Петров, Чакалиќ и Тотиќ дадоа по шест гола.
Финалето на групата донесе уште поубедлив триумф за Алкалоид. Против Пролет, „сино-белите“ ја искористија брзата и препознатлива игра и на крајот славеа со 34-18. На паузата резултатот беше 15-12, но во второто полувреме Алкалоид влезе во серија и не дозволи ривалот да се врати во игра. Голманот Трајков имаше свои моменти, но напорите на Пролет не беа доволни за пресврт.
Со овие резултати, Алкалоид ја потврди доминацијата во групата и обезбеди место на Ф4, придружувајќи се на Вардар 1961 и Еурофарм Пелистер. Се чека уште последниот учесник од турнирот во Охрид.
