Актуелниот бранител на трофејот во Купот на Македонија, Вардар, направи голем чекор кон одбрана на титулата, откако со две победи во еден ден обезбеди пласман на завршниот турнир.
Прв предизвик беше дуелот со Бутел Скопје, кој Вардар го реши со 26-19. Иако првото полувреме беше тесно и гостите од Бутел храбро се бореа, сепак „црвено-црните“ во вториот дел рутински ја обезбедија победата. Кеита беше најефикасен со четири гола, а голманите Валах и Гогов комбинираа 14 одбрани. Кај Бутел Скопје, Киселовски се истакна со четири погодоци.
Во финалниот дуел на групата, Вардарци играа со Еурофарм Пелистер 2, кој го победија со 27-22. По првите петнаесетина минути резултатот беше 9-5, но Пелистер 2 се приближи на 14-12 на паузата. Во завршницата, Вардар се одлепи со головите на Митровиќ, Анастасовски и Лазаревски, а голманите Еспиња и Гогов комбинираа 13 одбрани. Кај Пелистер 2, Славков даде девет гола.
Претходно, Еурофарм Пелистер 2 ја победи екипата на Мулти Есенс со 28-23, со Белистојаноски и Шулески како најдобри стрелци. На паузата тие водеа со 18-11, но и покрај обидите на противникот да се врати во игра, Пелистер 2 ја задржа контролата до крајот.
Со овие резултати, Вардар ја потврди првата позиција во групата и обезбеди место на Ф4, откако, претходно и Еурофарм Пелистер се пласираше во Ф4.
