Вонредното 16. коло во Првата женска фудбалска лига го донесе големото дерби во Струмица, каде Тиверија Брера успеа да го „сруши“ актуелниот шампион со 2:1, а со тоа и да се искомплицира битката за одбрана на титулата на тетовскиот тим.
По првото полувреме без голови, вториот дел донесе вистинска драма. Розита Пецева во 69. минута го отвори резултатот за домаќинките, но радоста траеше кратко – Улза Максути во 78. минута израмни на 1:1. Љуботен притисна во обид да направи пресврт, но на висина на задачата беше голманката Викторија Панчурова. Казната стигна во 87. минута, кога Данче Карпузовска погоди против својот поранешен клуб за конечни 2:1. Во самиот финиш струмичанки рутински го сочуваа водството и впишаа огромни три бода.
Киксот на шампионот го искористи лидерот Скопје, кој на домашен терен славеше со 3:1 против дебитантот Вардар. Рабија Дервиши го отвори резултатот во 31. минута, а Јована Каралиоска во продолжението зголеми на 2:0. Во 65. минута Дервиши со својот втор погодок донесе убедливи 3:0, додека Миа Закев во финишот само го ублажи поразот на гостинките. Со оваа победа, тимот од Пржино избега на пет бода предност на врвот.
Ефикасно беше и во Битола, каде Истатов со 3:6 славеше над Топ Гол. Гостинките имаа убедливи 0:5 на полувреме и практично го решија мечот уште во првиот дел. Радица Чонева постигна четири погодоци, а по еднаш стрелаа Ана Нешковска и Андреа Коловска. Во второто полувреме за домаќинките погодија Мила Коњановска, Сара Стефановска и Јоана Зебековска.
Драматично беше и во Кочани, каде фенерџијата Кочани беше блиску до изненадување против Каменица Саса, но загуби со 2:3. Јована Петрушовска и Ана Димитровска донесоа водство од 0:2, а Ивона Бангиева намали на 1:2. Гостинките од 43. минута играа со фудбалерка помалку по исклучувањето на Туане Де Соуза Фрагосо. Во 58. минута Ангела Стојковска израмни на 2:2, но искусната Димитровска со својот втор гол обезбеди тешко извојуван триумф за „рударките“.
Без голови заврши дуелот меѓу Речица и Ас Јунајтед (0:0), резултат кој за домаќинките значи важен чекор кон обезбедување директен опстанок.
Состојба на табелата
Скопје е лидер со 45 бодови, пред Љуботен со 40, а трката за титулата останува отворена. Истатов е трет со 32 бодови, додека Каменица Саса и Тиверија Брера го делат четвртото место со по 30. Ас Јунајтед има 27 на шестата позиција.
Речица и Вардар се израмнети на седмото место со по 11 бодови. Во долниот дел, Топ Гол и Кочани се на дното со по четири бодови и ги очекува жестока борба за опстанок. Една екипа директно ќе испадне во Втората лига, додека една ќе игра бараж против второпласираниот тим од Втората женска фудбалска лига.
