Првото пролетно коло во Првата женска фудбалска лига донесе голем број на погодоци, а највисока победа однесе шампионот Љуботен од 10:0 над Речица.
Лори-Ен Моисет постигна четири погодоци, двоен стрелец беше Елена Симјанова заедно со Улза Максути, а по еден гол постигнаа Александра Марковска и Хава Мустафа.
Лидерот Скопје го чува врвот, откако со 0:2 славеше на тешкото гостување кај Ас Јунајтед. Резултатот го отвори Јована Каралиоска со гол во 33. минута, а печат на победата стави Рабија Дервиши во 87. минута.
Истатов на рутина го доби мечот со „фенерџијата“ Кочани откако со 3:0 беше подобар тимот на Кирил Изов. Резултатот го отвори Елма Шемсовиќ во 17. минута за минимални 1:0 на полувреме, во вториот дел Канита Емини и Радица Чонева постигнаа два гола во 5 минути за конечни 3:0.
Вардар ја слави Михаела Марковска која го постигна победничкиот гол за триумф на Вардар од 1:0 над Топ Гол со што девојките на Теодора Димитровска победнички ја отворија 2026 година.
Каменица Саса убедливо го доби дербито со Тиверија Брера, откако „рударките“ славеа висока победа 3:0.
Ана Димитровска по десет минути игра го отвори резултатот, а во 24. минута Тчеури Харуми Гоја погоди против поранешниот клуб за 2:0 на полувреме. Во вториот дел Гоја со втор гол ги постави конечни 3:0.
Во однос на табелата Скопје е на врвот со 42 бодови и му бега два бода на шампионот Љуботен кој е втор. Истатов сега изби на третото место со 29 бодови, а пак Каменица Саса и Тиверија Брера со по 27 бодови го делат четвртото место, а пак Ас Јунајтед сега е шести со 26 бодови.
Вардар направи скок на табелата од едно место за седма позиција со 11 бодови, Речица е осма со 10 бодови, на дното се „заковани“ Топ Гол и Кочани кои ќе водат мртва трка за тоа кој да игра бараж за опстанок, а кој да испадни во Втора лига.
