РК Алкалоид и официјално потврди дека капитенот Игор Ѓорѓиев ќе продолжи да го носи синиот дрес и во наредниот период, со што клубот останува доследен на својата стратегија за градење конкурентен тим со македонски ракометари.
Дваесет и петгодишниот среден бек, кој е и актуелен репрезентативец на Македонија, одлучи да ја продолжи лојалноста кон Алкалоид, чиј член е од 2021 година. Во изминатите сезони Ѓорѓиев израсна во вистински лидер на теренот и надвор од него, а капитенската лента е само потврда за неговата улога во тимот.
Со новиот договор, раководството испраќа јасна порака дека континуитетот и довербата во домашниот кадар остануваат приоритет. Задржувањето на еден од носителите на играта е значаен чекор во амбициите на клубот за стабилен раст и дополнителен напредок на домашната и европската сцена.
Алкалоид и во наредниот период ќе ја темели својата визија на развој на македонски играчи, а продолжувањето на соработката со капитенот Ѓорѓиев е уште една потврда за таа определба.
