Штипските „соколи“ сериозно го засилуваат ростерот во клучниот дел од сезоната. Во борбата за пласман во Суперлигата, редовите на КК Соколи ги засили Даниел Нацевски, кој пристигнува од составот на суперлигашот Маџари.
Станува збор за кошаркар висок 195 сантиметри, кој покрива бековски позиции, односно може да одговори на улогите „два“ и „три“. Од клубот истакнуваат дека Нацевски се одликува со сигурен шут од дистанца, добра атлетичност и цврста скок-игра, квалитети кои треба да донесат дополнителна широчина и разновидност во нападот на штипскиот тим.
Засилувањето доаѓа во момент кога Соколи веќе го започнаа плеј-офот во Првата лига со убедлива победа на гостувањето кај КК Охрид (55-75), со што најавија дека сериозно атакуваат на место во елитата.
Во следното коло штипјани ги очекува дерби-пресметка против КК Мега Баскет на домашен терен, натпревар на кој се очекува и дебито на Нацевски во новиот дрес.
Борбата за врвот е исклучително неизвесна. Дури шест екипи – Струмица, Соколи, Бутел, Мега Баскет, Вардар и Борец – имаат по 11 бодови, додека Водно Санс и Охрид се со по девет, што најавува драматична завршница во трката за Суперлигата.
Со новата аквизиција, Соколи јасно испраќаат порака дека немаат намера да се задоволат со споредна улога, туку дека максимално ќе атакуваат на влез меѓу најдобрите.
