Второлигашот Осогово забележа победа на „генералката“ против третолигашот Победа во Валандово со резултат од 1:2. Ова беше последен тест за тимот на Крсте Крстев и последна можност да се провери формата бидејќи веќе следниот викенд започнува пролетната полусезона во Втората лига.
Осогово резултатот го отвори преку Стојанчо Велинов за водство од 0:1, гол по асистенција на Христијан Поп-Антоски, со овој резултат се замина на полувреме.
Во вториот дел Победа успеа да го израмни резултатот на 1:1 преку Елдан Шата, но по пет минути игра „жетварите“ го вратија водството на 1:2 преку гол на Филип Јованов, а тоа воедно и беше конечен резултат за славје на второлигашот од Кочани.
Осогово пролетната полусезона ја отвара следната сабота (21 февруари) на домашен терен против Каменица Саса на домашен терен.
Победа ќе има се уште време за подготовки, бидејќи стартот на пролетниот дел во Трета лига – Исток започнува на 8 март, а до тогаш „калинкарите“ ќе ја проверат формата со уште неколку пријателски натпревари. Целта на Победа од Валандово е влез во Втора лига.
