Македонската футсал репрезентација на успешен начин ги отвори подготовките за квалификациите за Светското првенство, откако во два контролни натпревари одиграни во Гевгелија забележа две победи против селекцијата на Австрија.
Избраниците на селекторот Газменд Хисејини славеа со 5:3 на првиот натпревар, додека во вториот триумфираа со 4:2.
„Одигравме два одлични натпревари. Противникот беше квалитетен и задоволен сум од она што го прикажаа фудбалерите. Шанса добија сите играчи кои ги имав на располагање, а во тимот настапија и неколку млади фудбалери на кои ова им беше прв настап за националниот состав. Генерално, задоволен сум од изданието на тимот“, изјави селекторот Хисејини.
Во двата дуели Македонија направи пресврт, иако противникот имаше водство. На првиот меч Австрија поведе со 3:0, но македонските футсалци со одлична игра во продолжението стигнаа до победа. На вториот натпревар гостите први поведоа со гол од слободен удар, по што нашиот тим брзо ја презеде контролата и го сврте резултатот во своја корист.
„На првиот натпревар влеговме малку опуштено и им дозволивме на Австријците лесно да постигнат голови, но во паузата ги договоривме работите и играчите тоа максимално го спроведоа на теренот. На вториот меч по примениот гол веднаш ја презедовме контролата. Посебно ме радува настапот на младите играчи кои покажаа дека заслужено се дел од репрезентацијата“, додаде селекторот.
Овие средби претставуваат вовед во квалификацискиот турнир за Светското првенство, кој ќе се одржи во април. Македонија ќе се соочи со Литванија, Турција и Бугарија.
„Квалификацискиот турнир ќе се одигра во април и верувам дека имаме реални шанси да ја минеме првата пречка и да обезбедиме пласман во главната фаза. Наш најсериозен конкурент за првото место ќе биде домаќинот Литванија, додека очекувам позитивни резултати во натпреварите против Турција и Бугарија. Секако, не смееме да потцениме ниту еден противник, но сметам дека квалитетот е на наша страна во однос на овие две селекции“, изјави Хисејини.
