Пелистер со убедлива победа ја стартуваше пролетнта полусезоната во ПМФЛ, совладувајќи го Работнички со 4-1 на „Петар Милошевски“, додека во Струмица Брера и Македонија Ѓорче Петров ги поделија бодовите играјќи 1-1 во рамките на 17. коло.
Во Битола, централна фигура беше Лука Булатовиќ. Србинот го отвори резултатот во 16. минута по асистенција од Марјан Ристовски, а во 34. минута со малку среќа зголеми на 2-0. Работнички се врати во игра преку Бесир Демири од пенал, но веднаш по паузата Булатовиќ со ефектен волеј по додавање од Милан Србијанац го комплетираше хет-трикот и практично го реши победникот. Во финишот, и покрај тоа што Пелистер остана со играч помалку, Вилдан Керим ги постави конечните 4-1. Битолчани сега имаат 19 бода и се деветти, додека Работнички со седум е претпоследен.
Во Струмица, Брера поведе преку Леонардо Петровиќ во 20. минута, но „лавовите“ возвратија пред одморот. Христијан Пецов не реализираше пенал, сепак по одбиената топка успеа да израмни на 1-1.
Второто полувреме донесе иницијатива на гостите, неколку спорни ситуации и црвен картон за Марио Ричков во 69. минута. До крајот немаше промена на резултатот, па Брера остана осма со 20 бодови, а Македонија ЃП десетта со 16.
