Македонскиот интернационалец Иван Николов имаше вечер од соништата во Купот на Босна и Херцеговина, откако на својот прв натпревар како стартер за Радник Бијелина постигна три погодоци во убедливата победа од 5-1 над Крушево.
Откако неколку дена претходно дебитираше како резерва против Сараево, македонскиот играч за врска овојпат ја доби шансата од првата минута – и максимално ја искористи.
Николов првпат се запиша во листата на стрелците во 35. минута, кога одлично реагираше по одбиена топка од стативата и ја испрати во мрежата за водство од 1-0. На почетокот на второто полувреме повторно беше во центарот на вниманието – прими топка на работ од шеснаесетникот и со прецизен удар ја зголеми предноста на својот тим.
Точката на одличниот настап ја стави во судиското продолжение, кога по една брза акција само ја „поттурна“ топката во голот, демонстрирајќи одлично чувство за простор и движење во шеснаесетникот.
Николов во Радник пристигна на крајот од јануарскиот преоден рок од данскиот Сондерјиске, а претходно во Данска настапуваше и за Вендсисел. Пред интернационалниот ангажман беше дел од македонските прволигаши Брегалница, Вардар и Брера, каде изгради сериозно име на домашната сцена.
Со ваков настап уште на стартот од својата авантура во БиХ, Николов испрати силна порака дека ќе биде еден од клучните адути на Радник во продолжението од сезоната.
