Македонското олимписко таеквондо продолжува со одлични резултати на меѓународната сцена, откако Дејан Георгиевски и Мила Релиќ освоија бронзени медали на силниот турнир „Австрија Опен Г1“, кој се одржа во Инсбрук. Новите успеси претставуваат уште една потврда дека таеквондото е меѓу водечките спортови во Македонија.
Во сениорската категорија +87 килограми, Дејан Георгиевски стигна до бронзениот медал по серија сигурни настапи. Во осминафиналето славеше со 2-0 против Иван Трајковиќ од Словенија, а потоа во четвртфиналето со ист резултат 2-0 го совлада и Патрик Дивковиќ, исто така од Словенија. Во полуфиналето Георгиевски беше поразен со 0-2 од Аболфазл Абасипоуја, со што го заврши настапот со заслужен бронзен медал.
До бронза стигна и Мила Релиќ во сениорската категорија до 62 килограми. Таа натпреварувањето го започна со победа над Фатима Менди од Сенегал со 2:0 во рунди, а потоа беше подобра и од Марија Леонова од Украина со идентични 2:0. Во четвртфиналето Релиќ ја совлада Хелена Кичема од Хрватска со 2:1 во рунди, додека во полуфиналето беше поразена од Јулија Шпак со 0:2, што ѝ донесе бронзен медал.
Солиден настап имаше и Филип Блажевски во сениорската категорија до 80 килограми, кој во кругот на елиминации беше поразен со 0-2 од Гумуш Кан од Германија.
Со освоените медали и прикажаните борби, македонските таеквондисти уште еднаш го потврдија својот квалитет на силен меѓународен турнир и продолжуваат да го градат успехот на македонското таеквондо на европската и светската сцена.
