Прволигашот Шкупи ќе има сериозни предизвици во пролетниот дел од Првата фудбалска лига. Откако клубот остана без тренерот, а не успеа да ги комплетира трансферите на неколку фудбалери, од тимот замина и Џихан Адили.
23-годишниот Адили кој потекнува токму од школата на Шкупи ќе продолжи во нова средина, а заминувањето го потврди самиот фудбалер.
„Денес не ми е лесно да му кажам збогум на ФК Шкупи. Овој клуб беше местото каде што израснав како фудбалер, но уште повеќе како човек. Секој тренинг, секој натпревар, секој момент поминат со овој дрес ќе остане засекогаш во моето срце. Да ја носам и капитенската лента беше извонредна чест и одговорност што секогаш ќе ја паметам. Од срце им се заблагодарувам на раководството на клубот за довербата, на стручниот штаб за поддршката, на соиграчите за секоја заедничка битка и на навивачите „Шверцери“ за љубовта и безусловната поддршка што никогаш нема да ја заборавам. Си заминувам со почит и голема гордост што бев дел од овој клуб. ФК Шкупи засекогаш ќе остане во моето срце“, рече Адили.
Низ неговата кариера покрај за Шкупи настапуваше и за Њу Старс, Велазерими од Кичево, Воска Спорт, Кораб од Дебар, Беласица, Кожуф и Брегалница, а меѓународна кариера градеше во Косово настапувајќи за екипата на Дреница.
Шкупи е на дното од табелата со само еден бод, пролетниот дел го отвара против Тиквеш, но наместо на Чаир ќе игра во Кавадарци како формален домаќин, а Тиквеш како формален гостин.
