Ракометарите на ГРК Охрид влегуваат во исклучително напорен период со натпревари на секои неколку дена. По дуелот од 20. коло во Супер лигата против МРК Куманово, „гладијаторите“ веќе во сабота ги очекува и нов европски предизвик во ЕХФ Европскиот куп против чешка Дукла Прага, што дополнително го зголемува значењето на секој одигран меч во овој ритам.
Охриѓани во вторник гостуваат во Куманово, каде домашниот тим секогаш има поддршка од својата публика во салата „Перо Наков“. И покрај набиениот распоред и процесот на адаптација на новите играчи, стручниот штаб и ракометарите се максимално фокусирани на продолжување на серијата добри резултати.
Голманот на ГРК Охрид, Бојан Блажески, го најави мечот со Куманово. Тој потенцираше дека тимот оди чекор по чекор, со целосна концентрација на секој натпревар, без разлика на густината на календарот и предизвиците кои следуваат.
„Овој период нè очекува набиен распоред. Нашиот фокус е секогаш да одиграме максимално на секој меч, особено во овој период во кој имаме и нови играчи кои треба да се привикнат на нашиот систем. Ни следува Куманово, каде секој натпревар имаат подршка од домашната публика. Ние се подготвуваме, анализираме и одиме да ја продолжиме серијата на одлични резултати.“- изјави Блажески.
Дуелот во Куманово е уште еден важен тест за формата и карактерот на ГРК Охрид во серијата натпревари кои следуваат. Со јасна цел, стабилна игра и фокус на сопствените задачи, охриѓани ќе се обидат да ја потврдат добрата форма, пред вниманието да се насочи кон европскиот предизвик со Дукла Прага во рамки на ЕХФ Европскиот куп.
