Минимална, но исклучително значајна победа забележа Санта Луција предводена од македонскиот тренер Емил Грнев, откако на гостински терен славеше со 0:1 против второпласираната Бирзебуџа во Втората лига на Малта.
Натпреварот беше одигран тактички зрело и дисциплинирано од страна на фудбалерите на Грнев, кои целосно го спроведоа планот на стручното раководство и создадоа неколку сериозни шанси и за поубедлив триумф. Решавачкиот погодок го постигна Џејк Кордина, доволен за големи три бода.
Со оваа победа, Санта Луција и натаму останува во игра за обезбедување пласман во плеј-офот. До крајот ги очекува тешка борба, а конечниот исход ќе зависи и од резултатите на директните конкуренти Гудија и Мгар, но шансите и натаму се реални.
По преземањето на Санта Луција, Емил Грнев веќе забележа реми и победа, што е јасен сигнал за позитивен тренд. Дел од неговиот стручен штаб е и Борче Постолов, кој заедно со Грнев работи на стабилизација и напредок на екипата.
На фотографијата е шефот на стручниот штаб Емил Грнев со маскотата на клубот и неговиот прв асистент Борче Постолов.
