Ракометниот клуб Бутел Скопје официјално промовираше уште две нови имиња во својот ростер, продолжувајќи со активностите на трансфер-пазарот во пресрет на следните предизвици.
Дресот на „црно-белите“ во иднина ќе го носат левиот бек Христијан Ѓурмешевиќ и кружниот напаѓач Матеј Марковски. Ѓурмешевиќ е младински репрезентативец на Македонија и во Бутел пристигнува од редовите на Мулти Есенс, додека Марковски доаѓа од екипата на Аеродром, каде што настапуваше во досегашниот тек од сезоната.
Овие две засилувања доаѓаат по претходното ангажирање на искусниот Мице Шилегов, кој се приклучи на Бутел Скопје од тимот на Вардар Неготино, со што клубот јасно ја зајакнува конкуренцијата во сите линии.
Ѓурмешевиќ, Марковски и Шилегов би можеле да го имаат своето деби уште на претстојниот натпревар против Струга, каде што ќе имаат можност веднаш да се наметнат пред стручниот штаб и навивачите.
