Македонскиот младински репрезентативец Александар Грашески направи голем чекор во својата фудбалска кариера, откако потпиша прв стипендиски договор со Динамо Загреб, еден од најтрофејните клубови во регионот.
Иако има само 17 години, Грашески веќе извесен период е дел од системот на загрепскиот клуб, а добрите настапи во младинските категории му ја донесоа и официјалната доверба од „модрите“. Тој е член на Динамо Загреб У19, со кого настапува во јуниорската лига, а договорот значи дека ќе продолжи да се развива во младинскиот погон на хрватскиот шампион.
Офанзивниот фудбалер во Хрватска се пресели минатиот февруари, кога од Њу Старс Скопје замина во екипата на Максимир, каде доби можност да настапува и во сениорска конкуренција во Третата лига. Тие настапи не останаа незабележани, па следеше повик од Динамо Загреб, чиј член официјално стана во август.
Во својата кариера, Грашески претходно беше дел и од младинската школа на Вардар, а важна улога има и во националниот тим. Тој ги има поминато сите младински селекции на Македонија до својата возраст и зад себе има повеќе од 30 настапи за репрезентациите до 15, 16 и 17 години. Во моментов е дел од У18 селекцијата, каде важи за еден од лидерите и капитените на генерацијата.
По периодот на рехабилитација од повреда, младиот креативец повторно е целосно подготвен за натпревари и со потписот со Динамо Загреб добива дополнителен мотив да го покаже својот потенцијал на највисоко ниво.
