Фудбалскиот клуб Тиверија од Струмица со нов тренер ќе ги започне подготовките пред стартот на пролетниот дел од сезоната во Трета лига – Исток. Стартот на тренинзите е закажан за понеделник, 9 февруари, кога екипата ќе влезе во подготовките со јасна цел – подобар пласман во продолжението од првенството.
На седница на Управниот одбор на клубот, на предлог на претседателот Александар Митев, за нов шеф на стручниот штаб е назначен Петар Каракашев.
Тој доаѓа од редовите на ФК Беласица, каде што работи како тренер во младинските категории, а неговото назначување е дел од пошироката соработка меѓу двата струмички клуба.
ФК Тиверија и ФК Беласица имаат одлична меѓусебна соработка, која во наредниот период дополнително ќе се продлабочува. Преку отстапување на млади фудбалери, пред сè од Струмичкиот регион, Тиверија ќе им овозможи минутажа и вредно искуство во сениорска конкуренција.
Тренинзите на првиот тим ќе се одржуваат во Струмица, на фудбалскиот терен со вештачка трева „Филип Лазаревски“, каде што Каракашев и неговите соработници ќе го подготвуваат тимот за предизвиците што следуваат.
Тиверија есенскиот дел од сезоната во Трета лига – Исток го заврши на осмото место со освоени десет бодови, а во пролетниот дел клубот ќе атакува на што повисок пласман и подобри резултати.
