Денес беше одигран пријателски натпревар меѓу актуелниот шампион на Македонија Љуботен и дебитантот во Првата женска фудбалска лига, Вардар во меч на кој тетовскиот тим кој ја брани двојната круна триумфираше со убедливи 8:0.
Новите засилувања на Љуботен се „распукаа“ со погодоци во дресот на новиот клуб.
Репрезентативката на Хаити, Лори-Ен Моисет која вчера беше промовирана во дресот на Љуботен постигна три погодоци во мрежата на Вардар, а пак Хава Мустафа и новото засилување Улза Максути беа двојни стрелци, додека пак еден гол беше дело на Ева Величковска.
Љуботен во пролетниот дел го очекува борба за одбрана на титулата, а пак Вардар да го потврди опстанокот во Првата лига како дебитант што е можно порано и да има мирна завршница од дебитантската сезона во фудбалската елита на Македонија во женска конкуренција.
