Женскиот фудбалски шампион на Македонија, ЖФК Љуботен, го реализира првото големо интернационално засилување во зимскиот преоден рок, ангажирајќи ја репрезентативката на Хаити со канадски пасош – Лори-Ен Моисет.
24-годишната офанзивна фудбалерка во Македонија пристигнува од силната австралиска лига, каде настапуваше за Сиднеј, а претходно беше дел и од канадскиот клуб Лавал. Во таборот на Љуботен со нејзиното доаѓање добиваат комплетен напаѓач кој може да одговори на сите офанзивни позиции и од кого очекуваат конкретен учинок – голови и победи.
Од клубот истакнуваат дека договорот со Моисет е насочен кон јасна цел: нови трофеи и продолжување на доминацијата на домашната сцена.
Нејзиното интернационално искуство и богато спортско портфолио ја вбројуваат меѓу најзвучните засилувања што пристигнале во македонската женска лига. Моисе веќе денес на пријателскиот меч против Вардар постигна хет-трик.
Љуботен есенскиот дел од сезоната го заврши на второто место, со само два бода заостанување зад лидерот ЖФК Скопје, кој ја понесе титулата есенски шампион. Во пролетниот дел, тетовскиот клуб ќе води жестока битка за одбрана на шампионската титула, но и за зачувување на трофејот во Купот – со јасна амбиција да ја одбрани „двојната круна“.
Со ангажманот на Лори-Ен Моисет, ЖФК Љуботен испраќа јасна порака дека сериозно атакува на сите домашни цели и во продолжението од сезоната. Во следниот период се очекува Љуботен да се засили со уште неколку фудбалерки.
