Ракометната репрезентација на Данска обезбеди пласман во финалето на Европското првенство, откако пред домашната публика во Хернинг го совлада Исланд со 31-28 во второто полуфинале. Пред речиси 15.000 гледачи во „Јуске Банк Боксен“, актуелниот светски и олимписки шампион ја оправда фаворитската улога и ќе се бори за трет континентален пехар во својата историја.
Исланѓаните одлично го отворија натпреварот и рано поведоа со 6-3, најавувајќи дека нема лесно да се предадат. Следеше подолг период на израмнета игра, со чести промени во водството и резултат „гол за гол“. Данска првпат успеа да се одлепи во финишот на првото полувреме, па на паузата замина со минимална предност од 14-13.
Клучниот момент дојде во вториот дел, кога избраниците на Николaj Јакобсен заиграа посигурно и со помалку осцилации. Иако Исланд неколкупати се враќаше на пристојна негатива, Данците постепено ја зголемуваа разликата и во завршните десет минути, носени од еуфоричната публика, направија решавачка серија за највисоки +4, по што немаше враќање за „рибарите“.
Најефикасен во победничкиот табор беше најдобриот ракометар на светот, Матијас Гидсел, кој постигна седум гола без промашување. Значаен придонес дадоа и Јохан Хансен со шест, како и Симон Питлик со пет погодоци. Кај Исланд се истакнаа Смарасон и Торкелсон со по седум гола.
Со овој триумф, Данска ќе игра свое петто финале на Европските првенства, а досега двапати се искачуваше на европскиот трон – во 2008 и 2012 година. Во големото финале, закажано за недела од 18:00 часот, Данците ќе се соочат со Германија, додека Исланд ќе има нова шанса за медал во дуелот за бронза против Хрватска, кој ќе се игра претходно истиот ден.
