РК Младост 1977 од Богданци сериозно ги покажува своите амбиции за вториот дел од сезоната, откако во своите редови донесе ракометар со суперлигашко искуство. Ново засилување на непоразениот лидер во Првата ракометна лига е 25-годишниот Марио Миланов.
Миланов настапува на позициите лев и среден бек, а во Богданци доаѓа по настапите за реномирани клубови како РК Бутел, РК Голден Арт и РК Фруит Ленд Борец. Според информациите од клубот, тој ќе го носи дресот на Младост најмалку до крајот на актуелната сезона, со што дополнително се зацврстува ростерот во клучниот дел од првенството.
Екипата од Богданци зад себе има совршена есенска полусезона – 12 одиграни натпревари, 12 победи и максимални 24 бодови, учинок со кој Младост 1977 испиша нова страница во својата историја. За првпат клубот стана есенски шампион без ниту еден пораз, потврдувајќи го статусот на главен фаворит за највисок пласман.
Во пролетниот дел, тимот предводен од искусниот стратег Горан Андоновски ќе атакува на директен пласман во Суперлигата. Со тоа, елитниот ракомет би се вратил во Богданци – малото гратче на југот на Македонија кое со право важи за еден од најракометните центри во земјата.
Според информациите на Спортска Мрежа, Миланов ќе биде единствено засилување, а ростерот е во целост сочуван, освен Антонио Николоски кој кариерата ја продолжи во БиХ.
Со ангажманот на Марио Миланов и со досегашните резултати, јасно е дека Младост 1977 не планира да застане на постигнатото и со голема самодоверба влегува во борбата за остварување на цел – директен влез во Суперлигата.
