Фудбалскиот клуб Арсими доби значајна и досега најголема институционална поддршка, откако Советот на Општина Гостивар на својата седница го изгласа буџетот за финансиска поддршка за клубот во износ од 6.000.000 денари за тековната година.
Од клубот истакнаа дека одлуката има посебна тежина, бидејќи беше донесена со 23 гласа „за“, од советници од сите заедници и етнички припадности во општината, што, според нив, претставува јасен показател за единство, консензус и широка поддршка за спортот и за претставувањето на Гостивар на највисоко натпреварувачко ниво.
Раководството на Арсими изрази искрена благодарност до општина Гостивар, до градоначалникот Валбон Лимани, претседателот на Советот Валдет Џафери, како и до сите советници, со посебен акцент на советниците од селото, за коректната соработка и континуираната поддршка, оценувајќи ја одлуката како историска за клубот.
Добиените средства ќе бидат насочени кон понатамошен развој на клубот, зајакнување на првиот тим, како и за унапредување на работата на клупската академија, во која се вклучени стотици деца и млади од Гостивар и околните населени места.
Арсими, презимува на петтата позиција на табелата со 22 освоени бода и солидна бодовна предност во однос на екипите од опасната зона, со оваа поддршка добива стабилна основа за понатамошен спортски и организациски напредок.
