Ракометната репрезентација на Исланд повторно е меѓу најдобрите четири селекции на континентот. Со сигурната победа над Словенија од 39:31 во последното коло од главната фаза, Исланѓаните обезбедија пласман во полуфиналето на Европското првенство и по пауза од цели 16 години повторно ќе се борат за медал.
Селекцијата од островската држава со нешто помалку од 400.000 жители уште еднаш покажа дека бројките не се пресудни во врвниот ракомет. Исланд пред 16 години го освои бронзениот медал на Европското првенство од 2010 годна во Австрија, па сега „рибарите“ ќе имаат нова можност за медал после толку години.
Во историјата на Европските шампионати, Исланд има и четврто место од 2002 година, додека настапот на шампионатот од 2010 година останува најуспешен со освоениот бронзен медал. Новата шанса за голем резултат доаѓа во полуфиналето, каде Исланѓаните ќе се соочат со домаќинот и еден од главните фаворити за титулата – Данска.
Во второто полуфинале ќе се сретнат селекциите на Германија и Хрватска, а Исланд ќе има можност повторно да испише историја и да се избори за финале или најмалку за ново европско одличје.
