Женскиот фудбалски тим на Виљареал доби значајно засилување за продолжението од сезоната, откако клубот постигна договор со младата и перспективна фудбалерка Симона Меијер. Родена во Холандија, а израсната во Македонија, пристигнува од израелскиот Макаби Хадера, клуб кој е дел од проектот Villarreal Academy и се натпреварува во најсилната израелска лига.
20-годишната Меијер е фудбалерка со изразен офанзивен потенцијал, која може да одговори на повеќе позиции. Таа најчесто настапува како лев бек или како крилна напаѓачка, а се издвојува по добрата визија во играта, техничката поткованост и квалитетните центаршутеви.
Дополнително, според искуството од настапите во Македонија, може да игра и во средниот ред.
Во својата досегашна кариера, Меијер ги носеше дресовите на ЖФК ЏИ-ЏИ Скопје кој е нејзин матичен клуб, а каде работеше со нејзиниот прв тренер Снежана Трпевска, потоа беше дел од ЖФК Кул и ЖФК Истатов, по што следеше интернационален чекор со трансфер во израелскиот Макаби Хадера. Кратко време беше дел и од исландскиот Кефлавик ИФ, со што стекна драгоцено меѓународно искуство на рана возраст.
Иако има и холандски пасош, Симона Меијер ја избра Македонија на репрезентативен план. Таа настапуваше за младинските селекции до 15, 17 и 19 години, а во 2023 година го забележа и своето деби за сениорската репрезентација на Македонија.
Со нејзиниот ангажман, Виљареал добива млада, но веќе докажана фудбалерка со интернационално искуство, која треба да донесе дополнителна енергија и квалитет во тимот во вториот дел од сезоната.
