Македонската алпска скијачка Јана Атанасовска имаше блескав настап на ФИС слалом трките што се одржаа во Телфс, Австрија, со што испиша нова страница во историјата на женското алпско скијање во нашата земја.
Во првата трка, Атанасовска го освои четвртото место и ги подобри своите ФИС поени на 26.41 – резултат кој претставува нејзин најдобар личен учинок во кариерата, но и највреден македонски женски резултат во слалом дисциплината досега.
Одличната форма ја потврди и во втората слаломска трка истиот ден, каде што заврши на шестата позиција со 30.78 ФИС поени, демонстрирајќи стабилност, сигурност и континуиран напредок во силна меѓународна конкуренција.
Овие настапи се дел од нејзините интензивни подготовки во пресрет на новиот олимписки циклус и претстојните Зимски олимписки игри во Милано, што дополнително ја зголемува тежината и значењето на постигнатите резултати.
Од Скијачката федерација на Македонија упатија искрени честитки до Јана Атанасовска, како и до нејзиниот тренер Александар Атанасовски – Чаве, за овој голем успех кој претставува силен мотив и охрабрување за идните генерации македонски скијачи.
