Фудбалскиот клуб Вардар од Брвеница официјално ги започна подготовките за пролетниот дел од сезоната во Третата лига – Запад, со јасна амбиција да се вклучи во борбата за највисок пласман на табелата и пласман во баражот за Втора лига.
По одлично одигран есенски дел, кој го завршија на третото место со освоени 21 бод, шест помалку од лидерот Камјани, во таборот на Вардар владее оптимизам и верба дека тимот има капацитет да направи исчекор во продолжението од шампионатот.
Подготовките се насочени кон темелна физичка и тактичка подготвеност, а стручниот штаб планира одигрување на три до четири пријателски натпревари со цел екипата максимално подготвена да ги дочека пролетните предизвици. Играчкиот кадар останува непроменет во однос на есента, состав кој веќе покажа стабилност и квалитет, но од клубот јасно порачуваат дека нема да се задоволат со досегашниот учинок.
Вардар Брвеница располага со балансиран тим, спој на младост и искуство, предводен од фудбалери со сериозно прволигашко искуство како Тони Брњарчевски, Игор Савески, Даниел Јандриевски, како и капитенот Даниел Радески, кој има значајна улога и на теренот и во соблекувалната.
Покрај спортските амбиции, клубот се издвојува и со својата стабилна организација и јасна визија за иднината. Раководството на Вардар Брвеница е отворено за соработка со бизнис секторот, со цел обезбедување дополнителна поддршка за понатамошен развој, унапредување на инфраструктурата и остварување на повисоките цели кои клубот ги поставува пред себе.
Секоја форма на финансиска поддршка, потенцираат од клубот, би имала значајно влијание во реализацијата на амбициите и во градењето стабилен фудбалски колектив со перспектива за идни успеси.
