Македонските прволигаши Силекс, Вардар и Струга Трим Лум ги продолжија зимските подготовки во Анталија, но на последните пријателски натпревари не успеаја да дојдат до позитивен резултат против силни меѓународни ривали.
Силекс го забележа третиот пораз на подготовките, откако загуби со 0-2 од босанскиот Железничар. Тимот од Сараево се покажа како поквалитетен противник и со головите на Ракиќ и Карамарко заслужено стигна до победа. Претходно, кратовчани беа поразени и од Словачко и од Бунјодкор со идентичен резултат 1-2.
Вардар, пак, го претрпе вториот неуспех во Турција, губејќи со убедливи 0-3 од рускиот прволигаш Динамо Махачкала. Русите стекнаа двојна предност уште во првото полувреме преку Аларкон и Мохамед Ази, додека конечниот резултат го постави Јан Џапо во завршницата. „Црвено-црните“ имаа свои моменти, но не успеаја да ја материјализираат иницијативата. Следен тест за вардарци е дуелот со Ахмат Грозни.
Струга Трим Лум го одигра третиот контролен натпревар во Анталија и го забележа првиот пораз, откако беше совладана со 0-2 од силниот Рубин Казан. Стружани одиграа солидно прво полувреме, но рускиот тим ја искористи својата шанса во продолжението, со погодоци на Кузнецов и Мукба. Претходно, шампионот на Македонија ремизираше со Тренчин и со Пахтакор.
Иако резултатите не беа во прв план, овие натпревари за македонските клубови претставуваат важен тест за формата и можност за корекција на слабостите пред стартот на пролетниот дел од сезоната.
