Нашите одбојкарски репрезентативци, капитенот Никола Ѓоргиев и примачот Александар Љафтов, на полусезоната се одлучија за промена на клупската средина и веќе ги официјализираа своите нови ангажмани.
Капитенот Никола Ѓоргиев, кој во првиот дел од сезоната настапуваше во Романија во редовите на Динамо Рапид, во продолжението од шампионатот ќе настапува во чешката Екстралига. Тој потпиша за Карловарско, тим кој моментално е лидер во првенството и важи за еден од најсериозните кандидати за титулата оваа сезона.
Чешкиот клуб официјално го претстави македонскиот репрезентативец, за кого ова е веќе 21. интернационална сезона, а воедно ќе биде и негов прв настап во Чешка во богата професионална кариера.
Од друга страна, примачот Александар Љафтов, по една полусезона помината во Кувајт, од почетокот на оваа година повторно се врати на европската сцена. Љафтов е ново засилување на унгарскиот МАВ Елоре, клуб кој сезонава има високи амбиции и важи за еден од главните кандидати за освојување на шампионската титула во националното првенство.
Двајцата интернационалци веќе им се приклучија на своите нови тимови и ќе бидат важни алки во вториот дел од сезоната, а нивната форма и континуитетот во настапите ќе имаат големо значење и за македонската репрезентација во пресрет на летните предизвици.
Македонија ова лето ја очекуваат важни настапи на меѓународна сцена – Европската лига 2026, како и учеството на Европското првенство 2026, каде што од Ѓоргиев и Љафтов се очекува да бидат меѓу носителите на играта.
