Македонската ракометна репрезентација го заврши настапот на Европското првенство со пласман на 14. позиција, што претставува солиден чекор напред во однос на претходниот континентален шампионат.
Иако групната фаза сè уште не е целосно комплетирана, веќе е јасно дека нашите ракометари со освоени три бода – по една победа, реми и пораз – утре ќе се вратат дома со вкупно четиринаесетто место во конечниот поредок.
Во конкуренцијата на селекциите кои не обезбедија место во главната фаза, само Фарските Острови имаат подобар пласман од Македонија, што дополнително ја нагласува вредноста на остварениот резултат.
Овој епилог значи напредок од три позиции во споредба со Европското првенство во Германија пред две години, кога националниот тим заврши на 17. место со два бода, освоени по триумфот над Швајцарија.
Зад Македонија, од 15. до 18. место, ќе се најдат репрезентациите на Италија, Чешка, Австрија, како и Холандија или Грузија, во зависност од конечните исходи во групите.
