Утре, со почеток од 16:00 часот, македонските футсал судии Марјан Младеновски и Доне Ристовски ќе ја претставуваат нашата земја на натпревар од групата Б помеѓу репрезентациите на Ерменија и Украина.
Натпреварот е дел од Европското првенство во футсал, кое се одржува во три држави – Литванија, Летонија и Словенија.
Судии на утрешниот натпревар ќе бидат: главен судија Никола Манционе (Италија), втор судија Кјара Перона (Италија), трет судија Доне Ристовски (Македонија), мерач на време Хикмет Кафарли (Азербејџан), четврти судија Марјан Младеновски (Македонија), додека контролор на судењето ќе биде Пери Готје (Белгија).
На ова Европско првенство во футсал ќе судат вкупно 32 судии, кои беа избрани од 42 европски судии што учествуваа на последниот судиски семинар одржан во Словенија. Меѓу нив беа и македонските судии Доне Ристовски и Марјан Младеновски, кои успешно ги минаа физичките тестови и проверките на познавање на правилата на футсал играта.
Европското првенство во футсал започнува од 21 Јануари и ќе трае до 7 Февруари 2026.
