РК Вардар официјално го потврди ангажманот на хрватскиот репрезентативец Леон Љевар, кој од следната сезона ќе го носи „црвено-црниот“ дрес. Станува збор за договор со важност од две години, со кој вардарци добиваат квалитетно засилување на позицијата лев бек.
Љевар има 24 години, роден е во Ријека и со своите 198 сантиметри важи за исклучително моќен и модерен бек.
Во Вардар пристигнува од словенечкиот Слован, каде сезонава имаше одлични настапи, особено на европската сцена. Во Европската лига постигна вкупно 44 погодоци и беше меѓу најистакнатите стрелци на својот тим, со што го привлече вниманието на ракометната јавност.
Покрај клупските обврски, Љевар е и дел од хрватската репрезентација, за која неодамна забележа неколку запазени настапи. Иако се најде на списокот на селекторот, поради помала повреда не настапи на Европското првенство кое се одржа во Данска, Шведска и Норвешка.
По потпишувањето на договорот, новото засилување на Вардар не го криеше задоволството од трансферот.
„Многу ми е големо задоволство и чест што потпишав за Вардар. Сите знаеме каква историја има Вардар и ми е драго што имам можност да бидам дел од таков клуб. Се радувам на играњето во Вардар и се надевам дека ќе помогнам на тимот да ги оствари сите поставени цели“, изјави Љевар.
Со доаѓањето на Леон Љевар, Вардар јасно ја покажува амбицијата за засилување на ростерот и градење конкурентен тим за претстојните сезони, како на домашната, така и на европската сцена.
