Македонската машка ракометна репрезентација денеска го игра клучниот натпревар од групната фаза на Европското првенство против селекцијата на Романија, во дуел кој носи голема резултатска и иднинска важност.
Селекторот Кирил Лазаров беше принуден на корекција во ростерот поради повредата на Петар Атанасијевиќ, чие место го зазема Гоце Ојлески, кој експресно се приклучи на тимот во Хернинг.
Во составот нема да конкурираат голманот Иван Галевски, пивотот Самоил Ристевски и левиот бек Дамјан Митев, додека Иван Џонов, и покрај одредени здравствени проблеми, е пријавен за настап.
Македонија со евентуален триумф сигурно би ја обезбедила третата позиција во групата, што значи бараж за Светското првенство 2027 и поволен статус во претстојната ждрепка.
Теоретски, постои и можност за пласман во главната рунда, но за тоа ќе биде потребна убедлива победа над Романија, како и соодветен исход од дуелот Данска – Португалија.
Избраниците на Лазаров влегуваат како фаворити, со оглед на позитивната традиција против романската репрезентација, но предизвикот ќе биде сериозен, особено против цврстата и дисциплинирана одбрана на противникот. Сепак, македонските ракометари знаат што е влогот и со јасна цел ќе излезат на терен – победа што носи надеж и чекор напред на европската сцена.
