Македонската ракометна репрезентација вечерва од 18:00 часот во Хернинг го игра својот последен натпревар од групната фаза на Европското првенство, а влогот е поголем од обична победа. Противник е селекцијата на Романија, меч кој мора да се добие, но и меч по кој ќе се гледа кон резултатот од Данска – Португалија.
По херојското реми со Португалија, „црвено-жолтите“ ја задржаа шансата за пласман во главната рунда, но сценариото е комплицирано. Македонија има еден бод и негативна гол-разлика, што значи дека покрај победа над Романија, потребен е и убедлив триумф на Данска против Португалија. Само така може да се стопи разликата и да се дојде до место во ТОП 12.
Но, дури и без чудо, вечерва има што да се брани. Победа над Романија значи сигурно трето место во групата, што носи полесен пат во квалификациите за Светското првенство 2027 година – само еден бараж-натпревар и поволен статус при ждрепката.
Историјата со Романците ветува борба. Во шест официјални меѓусебни дуели, билансот е целосно израмнет, по три победи за двете селекции, со мала предност на Македонија во вкупната гол-разлика. Секој од тие натпревари носел неизвесност, а вечерва, иако на неутрален терен, улогата на фаворит мора да се потврди на паркетот.
Селекторот Кирил Лазаров ќе бара максимална концентрација, цврста одбрана и брз проток на топката во нападот. Победа сама по себе не е доволна – потребна е енергија, ритам и желба за што поголема разлика, па потоа поглед кон Данска и надеж дека „долгот“ од минатото ќе биде вратен.
Вечерва Македонија игра за повеќе од бодови. Игра за иднината, за позицијата, за верата дека и кога математиката е против нас – срцето знае да ја помести.
