Голманот Даниел Ацев е трето заминување од редовите на суперлигашот Радовиш, тој кариерата ќе ја продолжи во нова средина, откако претходно од овој тим заминаа и Илија Табаков и Бобан Каковски.
Ацев шест месеци го чуваше голот на Радовиш, а сега ќе бара нов клуб каде да ја продолжи кариерата. Претходно, велешанецот настапуваше за Бутел Скопје, Голден Арт, беше дел и од Шампион, Охрид, Вардар Неготино, велешки Борец, а во странство беше дел од грчкиот тим Амфикитонес Ламиа.
Старо-новиот тренер Спасе Ѓорѓиев на голот ќе има неколку опции – останува искусниот Славјан Паунов, тука е и радовишанецот Александар Ристов, а клубот на располагање ќе има и голман од младинските категории, што е јасен сигнал дека Радовиш ќе вклучува свои млади играчи во вториот дел од сезоната давајќи им шанса да стекнуваат искуство во ракометната елита на Македонија.
