Македонската ракометна репрезентација доби дополнително засилување на Европското првенство во Данска, откако селекторот Кирил Лазаров беше принуден да направи промена во ростерот по серијата повреди.
По дуелот со Португалија, Македонија остана без двете леви крила, Иван Џонов и Петар Атанасијевиќ, што го натера стручниот штаб да побара итно решение за оваа позиција. Изборот падна на искусниот Гоце Ојлески, кој беше дел од резервниот список и доби повик експресно да се приклучи на националниот тим.
Капитенот на Охрид денеска треба да пристигне во Хернинг, каде ќе им се стави на располагање на соиграчите и стручниот штаб. Иако има 36 години, Ојлески доаѓа во добра натпреварувачка форма, бидејќи беше во тренажен процес со неговиот клуб Охрид, со кој одигра три натпревари против Врбас, а потоа два натпревари против Динамо Панчево и Тримо Требење на турнирот „Вук Рогановиќ“, па доаѓа максимално подготвен во нашиот репрезентативен табор за утрешниот меч со Романија.
Македонија во последното коло од групната фаза ќе се соочи со Романија, натпревар што е закажан за вторник со почеток од 18:00 часот, а „црвено-жолтите“ ќе бркаат позитивен резултат и пласман понатаму.
