Осогово го претстави Стојанчо Велинов како трето зимско засилување за пролетниот дел од сезоната. Станува збор за искусен фудбалер и повратник во второлигашот од Кочани, од кого се очекува со своето искуство значително да го подигне квалитетот на тимот.
По официјалната промоција во жолто-плавиот дрес, Велинов истакна дека е благодарен за укажаната доверба и дека за него претставува големо задоволство што повторно ќе настапува за Осогово.
„Чест и големо задоволство ми е што станува дел од овој клуб. Многу сум благодарен за укажаната доверба од страна на цела управа на чело со шефот на стручниот штаб. Се надевам дека ќе ги исполниме зацртаните цели на клубот и дека клубот ќе го издигнеме на едно повисоко ниво“, вели Стојанчо Велинов по промоцијата за нов играч на Осогово.
Целта на Осогово во пролетниот дел ќе биде директен опстанок во Втората лига, односно сезоната да се заврши меѓу првите осум екипи на табелата. Пролетниот дел кочанскиот тим ќе го отвори со натпревар против Каменица Саса на домашен терен.
