Женскиот ракометен клуб Атлетик продолжува со градење стабилна и долгорочна приказна, откако официјално го продолжи договорот со средниот бек Исидора Котевска, која ќе остане дел од тимот најмалку до 2029 година.
Котевска, родена на 11 април 2006 година во Прилеп, важи за една од најперспективните млади ракометарки во Македонија. Таа својата кариера ја започна во родниот град, настапувајќи за РК Филип Вардар, по што продолжи да се развива во ракометната школа Макалоски и во ЖРК Деспина. Подоцна следуваше преселба во Скопје, каде ги бранеше боите на Ѓорче Петров и Металург Автокоманда, а од оваа сезона е стандарден дел од амбициозниот проект на Атлетик.
Паралелно со клупскиот напредок, Котевска има и богато репрезентативно искуство. Во 2022 година го доби првиот повик за кадетската репрезентација на Македонија, а во 2023 и 2025 година настапуваше за младинската национална селекција, потврдувајќи го својот континуиран развој и потенцијал.
Продолжувањето на договорот доаѓа по извонредната есенска полусезона на Атлетик, кој доминантно ја заврши Првата женска ракометна лига со 11 победи од исто толку натпревари и максимални 22 бодови. Тимот има четири бода предност во однос на Ѓорче Петров 2 и Овче Поле СУ, кои го делат второто место.
Со ваквите потези, Атлетик уште еднаш покажа дека планира сериозно и на долг рок, со јасна визија за настап во елитната конкуренција и важна улога во македонскиот женски ракомет.
Пролетниот дел од сезоната, лидерот на табелата ќе го започне со гостување кај Овче Поле СУ во Свети Николе – натпревар кој ќе биде и прв тест за продолжението на шампионската трка.
