Борец е во се подлабока резултатска криза и од коло во коло оди кон се потежок опстанок во Втората лига.
Вчерашниот пораз од Вардар Неготино на домашен терен од 1:2 беше причина за спогодбена разделба меѓу клубот и шефот на стручниот штаб Даниел Стојановски. Од клубот му се заблагодарија на Стојавноски за досегашниот ангажман и му посакаа успех во тренерските води.
Борец сезоната ја започна со Љупчо Димитковски – Гањо, тренерот кој го водеше Борец и во Трета лига – Југ, но тој го водеше тимот во првиот три кола и во првото коло од Купот на Македонија каде Борец бележеше само порази.
Стојановски дојде во Борец кој практично тогаш немаше бодови на своето конто и од четвртото коло до 11. коло кое се одигра вчера младиот стратег успеа да запиша една победа над Вардарски и две ремија против Скопје и Детонит Плачковица, со што Борец на своето конто има пет бодови.
Во следниот период Борец ќе добие нов тренер, кој би бил трет тренер во есенската полусезона од која има уште четири кола.
Останува да видеме дали по назначувањето на новиот тренер Борец ќе излезе од резултатската криза, или сепак, можеби не секогаш резултатските кризи потекнуваат од тренерите!?
Борец е претпоследен на второлигашката табела со 5 бодови на своето конто и има пет бодови негатива од 13-тото место кое гарантира сигурен опстанок во Втората лига. Во следното коло на домашен терен Борец ќе има претежок натпревар против лидерот и Македонија ЃП, на овој меч ланскиот прволигаш ќе биде апсолутен фаворит.
