Второлигашот Шкендија Арачиново официјално го претстави своето осмо зимско засилување. Нов член на тимот е Хадис Таири, 20-годишен фудбалер кој пристигнува од редовите на прволигашот Струга Трим Лум.
Таири во Арачиново доаѓа како засилување на левата бековска позиција. Станува збор за млад, но веќе профилиран фудбалер, кој зад себе има настапи и за екипите на Охрид, Велешта, Њу Старс, Јанг Тим и Фламуртари. Од клубот посочуваат дека Таири носи тактичка дисциплина, сигурност во дефанзивната фаза и континуиран придонес по левата страна, што треба да донесе дополнителен баланс и стабилност во играта.
Со ангажманот на Таири, Шкендија Арачиново продолжува со активната зимска селекција во насока на создавање конкурентен и избалансиран состав, подготвен за високите амбиции во пролетниот дел од сезоната. Претходно, клубот веќе се засили со голманот Антонио Столевски, како и со Сухејб Рушити, Иљаз Чиљафи, Махир Ајрули, Владимир Жоглев, Зани Назифи и Махир Ајрули.
Шкендија Арачиново презимува на второто место на табелата во Втората лига со 35 бодови, само еден помалку од лидерот Охрид. Тимот од Арачиново, предводен од тренерот Љупчо Марковски – Калц, во пролетниот дел јасно ќе атакува на пласман во Првата лига.
