Второлигашот Брегалница официјално доби ново име во ростерот за вториот дел од сезоната, откако од денес Јорданчо Наумоски е нов член на „плаво-белите“.
Искусниот фудбалер ќе биде важна опција во средниот ред на штипскиот второлигаш во продолжението од шампионатот.
30-годишниот Наумоски зад себе има богато домашно искуство. Фудбалските чекори ги направи во ФК 11 Октомври од Прилеп, а како млад играч беше дел и од подмладокот на данскиот Брондби. Во Македонија настапуваше за повеќе клубови, меѓу кои Металург, Победа и Тиквеш, додека во Брегалница доаѓа од редовите на прволигашот Пелистер.
Со неговото ангажирање, Брегалница дополнително го зацврстува тимот пред стартот на пролетниот дел, каде што штипјани ќе атакуваат на влез во елитата. Се очекува во следните денови уште неколку засилувања да пристигнат во Брегалница.
Наумоски е второ зимско засилување во Штип, претходно Брегалница се засили со повратникот Бојан Рајков.
Клубот есенскиот дел го заврши на третата позиција со 33 бодови, три помалку од есенскиот шампион Охрид, а првиот пролетен предизвик Брегалница ќе го има на гостински терен против Кожуф во Гевгелија.
