ФК Љуботен и ЖФК Љуботен влегуваат во нова ера, откако на 12 јануари 2026 година се одржаа редовните годишни собранија на двата клуба кои го носат името на најстариот фудбалски колектив во Македонија и женскиот четирикратен шампион.
На собранието беше избрано ново раководство кое ќе биде заедничко за ФК и ЖФК Љуботен. За претседател на двата клуба е именуван Драгољуб Јовановски, додека старо-нови членови на Управниот одбор се Перо Јованоски, Ивица Богданоски, Илија Деспотовски, Дејан Савески, Владимир Билбиловски и Неџбија Имер. Како новина, собранието донесе одлука Управниот одбор да може да се прошири со уште два члена, со цел вклучување на потенцијални нови помагатели на клубот.
Поставена е и нова организациска структура, според која двата клуба, покрај Управниот одбор, ќе имаат и по еден спортски директор за ФК и ЖФК, маркетинг директор, генерален секретар и координатор за младинските екипи, со што се најавува посистематско и професионално функционирање.
Новиот претседател Драгољуб Јовановски ја претстави визијата за иднината на двата клуба и најави серија значајни чекори. Кај ЖФК Љуботен, за престојната полусезона се планирани три големи засилувања – едно домашно и две странски, при што преговорите се во завршна фаза. Целта е јасна и недвосмислена: одбрана на шампионската титула и освојување на Купот на Македонија, односно нова двојна круна.
Паралелно со тоа, клубот прави историски чекор во женскиот фудбал, откако е донесена одлука ЖФК Љуботен да има минимум три македонски фудбалерки со професионални договори, со амбиција таа бројка да порасне и до пет. Заедно со петте странски професионални фудбалерки кои клубот ги има во континуитет, вкупниот број на професионални фудбалерки би достигнал десет, што претставува преседан во македонскиот женски фудбал. Дополнително, одлучено е и шефот на стручниот штаб да биде со професионален договор и да поседува минимум УЕФА А лиценца, со цел значително подигнување на квалитетот на работата.
Кај ФК Љуботен, фокусот во следниот период ќе биде на консолидација на сениорската екипа, нејзино комплетирање и обезбедување сигурен опстанок во Третата лига, како и целосна реорганизација на младинската школа. Од јуни, машкиот клуб ќе влезе со јасни и високи амбиции – борба за првото место во Третата лига и атак на промоција во Втората лига, позиција за која, според многумина, Љуботен и припаѓа.
Круна на целокупниот проект е најавата за изградба на комплетно нов тренинг камп во близина на Тетово. Кон крајот на јуни или почетокот на јули се очекува поставување камен-темелник за тренинг центар со главен терен, помошен терен и други придружни содржини неопходни за современ фудбалски комплекс. Проектот е речиси целосно подготвен, а клубот се надева дека во неговата реализација ќе се вклучат и локалната власт, Фудбалската федерација на Македонија и Министерството за спорт.
Крајната цел на новото раководство е јасна – враќање на ФК Љуботен на вистинските патеки и позицијата што ја заслужува како најстар клуб во земјата, а ЖФК Љуботен да остане на шампионските патеки и да ја одбрани двојната круна.
