Второлигашот Детонит Плачковица од Радовиш со јасна визија влегува во пролетниот дел од сезоната, а тоа најдобро се гледа преку измените во играчкиот кадар. Клубот веќе направи неколку конкретни потези, со кои го крои ростерот за продолжението од Втората лига.
Радовишани се разделија со неколку фудбалери кои беа дел од есенскиот дел на шампионатот. Клубот повеќе нема да смета на Валентин Кочоски, Давид Велковски, голманот Стефан Нанчовски, како и на Мартин Пивковски, што отвори простор за освежување и нова енергија во тимот.
Во исто време, Детонит Плачковица веќе обезбеди и први засилувања. Во клубот се враќа искусниот Томи Мирчевски, кој повторно ќе го носи дресот на радовишани, овојпат доаѓајќи од Слога Виница. 29-годишниот фудбалер зад себе има богато искуство, настапувајќи за Воска Спорт, Брегалница, Борец, Плачковица, Брегалница Делчево, Скопје, Вардар, како и за Цементарница – клубот во кој ги направи првите фудбалски чекори.
Нов член на тимот е и голманот Павел Петревски, кој ќе ја засили конкуренцијата меѓу стативите и се очекува да биде важен дел од тимот во борбата за бодови во пролетниот дел.
Од клубот најавуваат дека во наредните денови ќе следуваат уште промоции на нови засилувања, по што ќе биде комплетиран конечниот ростер со кој Детонит Плачковица ќе настапи во пролетниот дел од Втората лига.
