Ракометниот клуб Младост 1977 од Богданци официјално ги започна подготовките за вториот дел од сезоната 2025/26 во Првата ракометна лига, во која тимот влегува со максимален учинок и јасна цел – одбрана на првото место и директен пласман во Супер лигата.
Богданчани го завршија есенскиот дел како убедлив лидер на табелата, без ниту еден пораз и без загубен бод, со максимални 12 победи од 12 натпревари, со што испишаа уште една значајна страница во богатата клупска историја.
Под водство на стручниот штаб предводен искусниот стратег Горан Андоновски, подготовките ќе се реализираат во спортската сала „Млаз“ во Богданци, со фокус на физичка и тактичка подготвеност, а поволните временски услови ќе бидат искористени и за тренинзи на отворено, на стадион.
Во пресрет на продолжението од првенството, Младост 1977 ќе одигра и два пријателски натпревари против суперлигашки екипи, како важен тест за формата на тимот.
Првиот официјален натпревар во пролетниот дел од сезоната е закажан за 14 февруари 2026 година, кога Младост на домашен терен ќе го пречека тимот на Партизан од Гевгелија.
На првиот тренинг присуствуваа речиси сите ракометари, со исклучок на левиот бек Антонио Николоски, кој и покрај обидите на клубот да ја продолжи соработката, одлучи да ја напушти средината. Клубот официјално му се заблагодари за придонесот и му посака многу среќа и успех во понатамошната кариера.
По барање на тренерот Андоновски, во сениорскиот тим се приклучени и неколку талентирани ракометари од кадетската екипа, кои се гледаат како иднина на клубот и дел од долгорочната стратегија за развој.
Во текот на оваа недела се очекува и промоција на новите засилувања, со кои ќе биде комплетиран ростерот за пролетниот дел, во кој Младост 1977 ќе води жестока битка со второпласираниот Мулти Есенс од Автокоманда за задржување на лидерската позиција – место кое единствено обезбедува директен влез во ракометната Супер лига.
